中環出更：月餅義賣 名人認捐濟貧
距離中秋節約有兩個月，政商界提早買月餅行善支持內地扶貧工作，其中「快勞夾大王」、國際小母牛香港分會籌款委員會主席杜振源，率先用五十萬元認購月餅，認真大手筆，之不過究竟五十萬合共買到幾多個月餅，以及要幾多人先食得晒，杜振源坦言冇諗過，強調一定會捐出嚟畀啲有需要嘅人，等大家都可以開開心心咁過中秋節。
每年中秋節前夕，除咗傳統亦有新款式嘅月餅面世，部分月餅開始喺工場製作中，部分更提早開賣，當中詠藜園今年決定捐出一批月餅義賣，據知係根據四款御膳秘方來製作，而扣除製作月餅嘅材料開支，有關方面會將所得善款部分用於本地慈善，亦會將部分捐畀小母牛，以支持佢哋於內地嘅扶貧工作。
本身做開化妝品生意嘅莎莎國際主席郭少明，知悉今次月餅義賣咁有意義，因此決定下月開始，於旗下嘅化妝品零售店兼賣慈善月餅劵。小母牛副主席、前高官葉澍堃認為港人要知福，佢以前曾到內地山區探訪，有當地農民透露每年只能夠食兩、三次豬肉，而今次義賣嘅月餅，當地人更可能從未試過，所以呼籲大家購買慈善月餅後，真係要好好品嘗。
社會應互相體諒多包容
對於今次義賣月餅，將令部分內地貧困人士受惠，國際小母牛香港分會主席梁錦松高興嘅同時亦有多少感慨，佢自言香港過往經歷多次困難時期，每次內地都願意伸出援手，因此希望港人要以同胞嘅愛來對待內地人，唔好阻礙內地人購物。佢又語重心長話，香港近年來社會好撕裂同對立，希望大家互相體諒，多啲包容，香港才會更加美好。
卓妮