一個人走背運嗰陣，喝涼水都塞牙。其實，倒楣企業一樣嘅咋，國泰航空管理不善，黑氣纏身，唔係呢樣出事，就係嗰樣甩漏，醜聞簡直好似含鉛超標嘅屋邨食水咁，源源不絕，撳都撳唔住吖。
嗱，又出事嘞。國泰一班由香港經台灣飛日本航班，喺台灣起飛時因貨艙門訊號燈突然亮起，電光火石之間緊急煞停，搞到過百乘客飽食驚風散。雖然事後證實艙門無誤，只係感應出現問題，但飛機需要重新檢查，結果航班延誤四小時，乘客怨聲載道。國泰事後向每位乘客賠償約四百港元，問題係，乘客無端端嚇餐飽，仲要承受航班延誤嘅不便，幾張紅衫魚莫講彌補唔到損失嘅時間，連買驚風散都唔夠喇。
講真，家陣幫襯國泰好似幫襯山寨貨咁毫無保障，乘客受延誤固然谷氣，能夠平安抵達目的地已經算好彩咯。日前三名內地女大學生來港轉機飛澳洲開學，因為天氣阻延錯失轉機嘅國泰航班，向國泰查詢時，對方居然闊佬懶理，一味當人球咁踢，結果一等就等足一日。咁都未算最慘，國泰發錢寒，嚴重超賣機票，搞到唔少乘客有機票冇得上機，大失預算，直言以後唔會幫襯呢間無良公司。
所以話，香港想唔沉淪都難，連搭飛機都要望天打卦，仲點配叫「國際城市」吖。航空服務唔係講玩，既關乎乘客生命安全，亦關乎香港國際樞紐地位，應該精益求精，不斷進步，可惜國泰作為本港龍頭航空公司，服務唔係與時並進，而係與時並退，烏龍百出，醜聞不絕，唔係客機食水含菌，就係航機上演九霄驚魂，唔係工潮影響服務，就係誤點害慘乘客，搞到國際排名跌跌不休好正常啫。咪話功夫茶唔提醒，國泰管理不善，警示不斷，萬一爆出大鑊嘢，隨時機毀人亡都有之！
最好笑嘅係，國泰負面新聞不絕如縷，佢哋唔係反躬自省，反而遷怒傳媒，居然下令唔准將如實報道醜聞嘅《東方日報》運送上機及派發畀乘客，幸有正義員工踢爆事件，將有關劣行公諸於世。呢啲咪叫掩耳盜鈴囉，以為揞住乘客對眼，睇唔到國泰點樣出錯出醜，就當作自己無出問題，簡直係自欺欺人。正如有立法會議員炮轟，《東方日報》為民發聲，國泰剝奪讀者知情權，好明顯係無私顯見私，更加證明佢哋心虛。
見到國泰呢幕禁報令鬧劇，功夫茶不禁想起「防民之口」嘅典故。話說周厲王昏庸無道，殘民以逞，國道衰落，佢唔想聽到批評聲音，四圍抓殺異見者，最後國人忍無可忍，爆發起義，殺入王宮，厲王淪為喪家之犬。國泰劣迹斑斑，民怨載道，實在有幾分周室衰落嘅影子，如果再唔改善服務，一味掩醜，一樣無好下場嘅咋！