純小希愛遊戲不愛宅

記得有機迷表示,如果搵到一個同佢一樣鍾意打機嘅女仔,就算短幾年命都冇所謂,難怪同為機迷嘅內地索模純小希一出道,就憑住佢熱愛打機,加上令男士為之陶醉嘅迷人外形,吸引萬千機迷同宅男。

資深女模

今年23歲出生於北京朝陽區嘅純小希,原名叫做張雨萌。咪以為呢位擁有出眾外形嘅索模,只係徒具外表,據悉呢位身材火辣嘅模特兒喺佢讀高中二年級時,憑住喺文化考試中獲取520分嘅高分,而被內地著名學府北京大學破格取錄,絕對係位內外兼備嘅女神。雖然佢嘅學術成績唔錯,但係佢並無選擇往所修讀嘅專業發展,反而憑住出眾嘅天賦本錢,先後喺多個選美比賽中得到獎項,當中更包括中國古典才女選美大賽嘅冠軍。不過咪以為佢嘅模特兒生涯,喺呢個時候先至開始,原來早喺佢小童時,就已經開始拍攝平面及電視廣告,及至佢喺選美比賽中大放異彩,亦即係2006年時,廣告數量更係直線飆升,並且開始參與電視劇及電影嘅演出,與此同時又踩入樂壇,果真係多棲發展。

宅男至愛

喺多個界別取得成功嘅同時,佢更贏得一班忠實嘅粉絲,而當中佔絕大部分嘅更係機迷,點解佢會如此得機迷嘅喜愛呢?原來本佢身亦係機迷,不但經常為手機及網絡遊戲做代言,又經常同機迷喺網上分享打機心得,而佢更表示過願意喺虛擬世界搵男友。呢句說話對男機迷嚟講,簡直係甜到爆炸呀!試問呢個世界有幾多個好似佢咁索,又鍾意打機兼且願意同男友一齊打機嘅女仔呢?難怪佢能夠獲得一眾機迷支持。不過,佢又補充指雖然好鍾意打機,但唔希望未來嘅男友只係沉醉於遊戲世界之中,反而希望能夠同佢抽空去旅遊,而所去嘅地方亦唔一定係外國。事關佢嘅願望就係同心愛嘅男人,喺唔同嘅地方留下各種美妙嘅回憶。如此甜到漏嘅說話,一個唔小心就會畀佢迷倒呀!

專屬網站

除咗外形同三圍令人難忘外,其實純小希嘅性格仲有好多特點未講,好似佢嘅直率、純真、友善等等,每種性格都輕易令男士動心。如果想了解多啲佢嘅生活點滴,就要追蹤住佢嘅個人微博喇!

網址:weibo.com/u/3945782161

純小希Profile

出生地:北京

身高:166cm

三圍:35、24、35

撰文:魂