有道是「弱則唾面而肯自乾，強則單騎而能赴敵」，講嘅無非指人要有自知之明！自己弱雞，好似國泰咁，服務質素江河日下，最近幾乎日日畀乘客投訴客機延誤、安排不當，令乘客徬徨不安；又畀本報踢爆管理不善，當值國泰空少玩手機瞌眼瞓，無視乘客安全……
醜聞衰嘢爆不絕嘅國泰，如果有心改過，虛心納教，本應多謝讀者最多，銷量第一獨霸紙媒嘅《東方日報》，皆因人哋指出自己咁多過失，正如有議員話齋，都係想你「有則改之，無則加勉」啫，點知國泰管理層老羞成怒，小器到向員工下達書面禁令，不准把多次如實報道國泰負面新聞嘅《東方日報》運送上機及派發予乘客！
孟子話孔子作《春秋》而亂臣賊子懼。孔子作《春秋》有乜好驚呢？皆因亂臣賊子犯了罪行，做了見不得光嘅衰嘢，害怕畀《春秋》記載下來，會受到當時和後世的唾罵。國泰唔通以為唔畀乘客睇《東方》就可以隻手遮天，可以明知而故犯，可以犯錯而不自知，可以一錯再錯，一錯到底？
「凡攻我之失者，皆我師也」，國泰管理層連如此顯淺的道理也不懂，你說它還會勇於改進嗎？老朽批其像玻璃窗上嘅烏蠅——前途光明，沒有出路，看來一語中的！
勢估唔到國泰心虛如此，咁冇自信，跌倒了又怎可以再站起來？唔畀乘客睇《東方日報》，你估你哋啲醜事就唔會傳千里嗎？唔好忘記「上東網知天下」，空少當值都玩手機，乘客難道唔識上東網嗎？
唔畀乘客睇《東方》，國泰除了混吉事，如今又添一筆滑稽事！世上滑稽事多矣，如嬰兒含着煙斗，這事很不正常，可別人一看就明白，嬰兒不懂事，甚麼都往嘴裏放；而國泰管理層，仍停留在嬰兒階段，只懂製造滑稽笑料！下一步可能不准乘客帶手機、電腦上機！哈哈哈……