中環出更：甩轆影響曾鈺成民望大挫
建制派表決政改方案時「甩轆」集體離場，引發民望危機。港大民意研究計劃尋日公布政改表決否決後首個「十大議員」民意調查，本身喺民建聯嘅立法會主席曾鈺成，雖然以六十一點三分獲得第一名，但評分就大幅下跌二點一分，跌幅係上榜議員之冠，未知係咪同佢參與建制派WhatsApp群組「通水教路」有失主席中立角色，以及發表種族歧視言論有關。不過，曾鈺成已承認參與群組令政改「甩轆」更加添煩添亂。
十大議員 長毛包尾 大舊出局
調查喺本月訪問咗約二千名市民，按市民熟悉度選出十大議員，再進行評分。曾鈺成評分就較上次下跌二點一分，為其民望響起警號。
否決政改方案嘅人民力量「大舊」陳偉業同「長毛」梁國雄，評分亦分別下跌兩分及一點五分，而工黨李卓人評分亦下跌一點二分，而排名就下跌兩位排名第八，至於長毛就包尾，大舊更被踢出榜外。至於民主黨劉慧卿則輕微下跌零點一分，排名第六位。
葉劉喊住道歉 疑獲同情分
雖然政改方案被否決，但亦有議員評分逆市上升，升得最勁係黃毓民，爆升三點一分，其次是新民黨葉劉淑儀，升咗兩分，排第四位，未知係咪同葉劉喺建制派「甩轆」集體離場後上電台節目喊住道歉，因而獲得市民同情原諒呢？而葉劉嘅黨友田北辰亦有零點八分進帳，排名第三位。至於田北辰嘅大佬田北俊，由上次榜上無名到今次得五十五點三分，排喺第二名。
卓妮