中環出更：青年創業 捕捉都市新口味
香港有唔少本地產品都好高質素，但要喺芸芸產品中脫穎而出一啲都唔容易。香港品牌發展局尋日邀請咗幾位去年嘅得獎品牌負責人同大家分享經營心得及故事，讓有意創業嘅年輕人參考吓。卓妮見到Lab Made分子雪糕專門店創辦人鄭康宏（Ronnie），佢成功捉摸港人喜愛嘗試新事物心態，但要不停炮製新口味，當中亦試過失敗。
棄藥劑專業 研分子雪糕
Ronnie本身於英國做藥劑師，有次喺倫敦見到咁得意嘅分子料理，認為有潛質引入香港，加上佢好鍾意美食，因此毅然放棄專業去研製雪糕。佢話試過因應節日例如農曆新年，研製年糕口味及質感嘅雪糕，但直至推出前兩日，都只係做到年糕質感，而做唔到煎年糕嗰種香味。佢創業初期亦遭家人反對，在處理液態氮時又要通過安全測試等評估，落咗好多心機先取得牌照。
糖果千金 轉攻蛋糕裝飾
要創業，因應大眾興趣及口味隨機應變亦好重要。烘焙設計及原材料公司領天國際創辦人葉致欣，家族本身經營糖果生意，但早幾年發現唔少人鍾意訂造靚蛋糕，於是每個周末逐家烘焙店敲門推銷其蛋糕裝飾產品。
品牌發展局主席黃家和話，今年嘅四個品牌選舉都正式開始接受報名，屆時於工展會內接受公眾投票。而剛去完九州旅行嘅理事盧金榮講起早幾日有郵輪因為打風而更改航線，佢就話自己去九州時都因天氣問題而睇唔到火山口嘅景色，但安全至上，有突發情況都無計。
卓妮