黃台之瓜，何堪再摘，鉛水事件引起滿城風雨，本來已經周身蟻嘅港府，再次成為千夫所指，連日來應接不暇，狼狽不堪。當局為咗補鑊，決定成立由法官任主席嘅獨立調查委員會，一來追查禍源，二來追究責任喎。嗱，今次事件搞到人心惶惶，成立委員會調查固然唔少得，但咁係咪就可以消除居民嘅疑慮呢？「東方報業民意調查」發現，受訪者普遍對政府監管食水失去信心，認為工程驗收把關不力，漏洞多多，對房屋署敷衍塞責尤其不滿。
港府話喎，委員會調查嘅範圍包括事件成因、檢視食水供應系統嘅設計及維修保養等制度係咪妥當，以及提出建議確保食水安全。即係咁，呢啲亡羊補牢措施可唔可以解決問題，仲要拭目以待，當務之急係盡快搵出禍源，安撫人心，否則講乜都係假。諗落今次事件實在太離譜，公屋啟用兩年就爆出食水安全危機，居民連飲啖乾淨食水都可遇不可求，又點會對港府有信心吖。
最離譜嘅係，喺今次事件中，房屋署先係隱瞞，繼而敷衍，對居民投訴食水有異味闊佬懶理，直到有政黨踢爆含鉛超標，至死死氣被動跟進，你話呢啲官僚係咪抵鬧吖？正如「東方報業民意調查」顯示，五成二受訪者認為監管存在漏洞；兩成八人批評當局工程驗收把關不力。至於房屋署同水務署最初堅稱食水冇問題，三成三受訪者認為當局敷衍塞責；兩成七人直指兩個部門涉隱瞞真相；兩成三人狠批驗水馬虎。
市民眼睛係雪亮嘅，房署監管失職，唔自我反省不特止，仲一味將責任推畀「水喉匠」，簡直係縮骨。其實，正因為港產官僚冇承擔，鉛水風波至會愈鬧愈大，由民生事件變成政治事件。依家除咗多個公共屋邨面對同樣危機，連私家醫院亦可能中招，而私人樓宇究竟有冇問題根本冇人知，呢場鉛水風波隨時演變成公共衞生危機。上述調查顯示，三成九受訪者認為本港已出現食水安全危機；三成四人批評當局無定期檢驗屋邨食水。另外，唔少受訪者擔心當局為求趕工而把關兒戲，犧牲質素。
呢啲擔心唔係杞人憂天o架，當年爆發居屋短樁醜聞，咪就係因為港府追求「八萬五」而出事囉。正所謂，前車之覆，後車之鑑，當局冇吸取教訓，一味敷衍塞責，唔出事至奇喇。
講多無謂，食多會滯，行動最實際，「民生無小事」唔係靠把口齋噏，鉛水風波係對港產官僚嘅當頭棒喝，如果做完場獨立調查嘅大龍鳳，之後又關人個關，類似醜聞睇怕陸續有來吖！