政情：公民講場：踩希債「貼金」財爺別有用心

希臘債務危機暫時告一段落，財政司司長曾俊華（鬍鬚曾）發表題為「希臘斜陽」嘅最新網誌，疑趁機為自己成日掛喺口邊嘅審慎理財哲學「貼金」，直指呢件事提醒佢要謹守穩健嘅財政紀律，維持政府財政健全，並唔只係一盤漂亮嘅帳目，仲可以發揮重要嘅穩定社會作用，相反公共財政危機可能牽連嘅問題，亦非社會大眾能夠承受。佢又回想當年去過希臘旅行，自言諗不到今日認識嘅希臘，除咗小島嘅醉人美景、豐富嘅神話故事同埋偉大嘅古國文化，仲多咗一段值得世人借鏡嘅現代經濟興衰史。其實講咁耐，鬍鬚曾似乎都係想借希臘債務危機例子，為自己成日被批評守財奴嘅理念平反！