政情：重磅黎榮浩 唔敢再划艇
黃大仙區議員黎榮浩（Joe）出任議員十多年，佢自爆如果當年唔係當選區議員，可能會參加奧運會！Joe憶述，自己讀書時做過划艇隊隊長，形容划艇消耗好多體力，出咗嚟做嘢冇可能再兼顧到，又話屋企供書教學咁多年，當時全職做運動員係無法養家。Joe又話，自從冇玩划艇多年，體重即刻直線上升，重咗接近四十磅，講笑話依家一坐落艇就會下沉，所以唔可以再玩嘞！
考慮出戰九龍東
對於今、明兩年區議會、立法會兩場選舉，出任區議員十多年嘅Joe話，唔可以做得耐而鬆懈，特別係佢嘅選區橫頭磡有好多其他黨派議員開設辦事處，做得唔好就好容易令選民流失。當問及該黨九龍東立法會議員陳鑑林預料會退下火線，會否爭取染指九東出選，Joe稱仍在考慮中，又指依家做立法會，需要花好多時間處理會務以外嘅事宜，舉例指好似拉布，因此都係一個挑戰。