政情：免費黑超 陳樹英派住先
夏天陽光零舍猛烈，唔少人都會戴番副太陽眼鏡擋一擋陽光。屯門區議員陳樹英（阿Tree）都唔執輸，向街坊免費大派防UV太陽眼鏡，被質疑係蛇齋餅糉嘅升級版，阿Tree接受查詢時稱「唔係好有意識去做呢啲嘢」，如果有人於十月再送嘢嚟就唔會派，可能會留到選舉結束後先再派喎。
選舉將近 幫人派要等等
阿Tree就今次免費送太陽眼鏡解畫，佢話呢批太陽眼鏡係佢認識嘅廠家送出嚟，形容雖然係貨尾，個款睇落都幾潮，可能後生仔女都啱，但因為患白內障嘅長者對眼唔曬得，佢哋有需要多啲，所以就長者優先。 阿Tree又話，其實不時都有人託佢送嘢畀街坊，例如早前就有生果檔老闆送生果，不過選舉將近，如果有人十月再送嘢嚟，佢就可能會留到選舉完咗先再派喇。不過講開又講，早前有啲聲稱防UV嘅眼鏡唔係真係防UV，唔知阿Tree今次派前有冇驗貨？