政情：葉劉亂槍轟政府

產業失敗 M+地細欠資金

葉太於分享會中一開始唔係想針對財政司司長曾俊華（鬍鬚曾），認為對方只係承傳前人做法，用審慎理財嘅口號，佢又話今年財政預算案有提到競爭力，不過都只係講自由經濟，其實競爭力包括好多方面，暗批鬍鬚曾無宏觀嘅經濟視野，只停留喺殖民地思維。

講到興起，葉劉其後把矛頭轉向多個政策範疇，先指政府產業政策失敗，好似西九M+咁，地方又細、資金又投放得唔夠，直言「文化唔係生長係紅泥石屎地，要畀佢有機地成長，依家政府只係投放廿億，一幅名畫都十億」。

對於近年落成嘅啟德郵輪碼頭，葉劉亦有意見，佢認為香港唔可能成為郵輪母港，又指地中海區域做到唔代表香港都做到，事關香港年年都有颱風，每年至少幾個月唔能夠畀郵輪停泊，質疑負責郵輪碼頭嘅官員根本無搭過郵輪，如果唔係冇可能唔知道，不過唔起都起咗，真係「喊都無謂」，佢建議不如諗下點做好啲仲實際。

提到購物 拖埋下一代落水

葉太再提到，機場北會搞大型購物區，據稱三跑計劃亦有購物區，認為係過度供應，唔通想下一代仔女個個都賣手袋同鞋？

話時話，葉劉身為「雙料議員」，於香港政圈踏入「後政改」時火氣十足批評多項政府施政，究竟係咪意有所指，或想傳遞啲乜訊息，留待大家自行判斷嘞！