中環出更：英中唔落車 田二少：掛羊頭賣狗肉
由吳克儉（吳得掂）領導嘅教育局，最近決定宣布暫緩微調中學教學語言政策，唔使收唔夠第一級別（Band 1）學生嘅英中「落車」，被批評係政治決定。語文教育及研究常務委員會前主席、立法會議員田北辰（田二少）尋日出席書展講座，炮轟教育局今次係返回九十年代「掛羊頭賣狗肉」，唔合資格做英中又要維持英中地位，咁搞落去遲早出事。
憶男拔歲月 老師咬音唔準
田二少憶述，自己當年讀拔萃男書院，只係死記硬背，不停抄黑板，當年嘅老師都係被迫用英文教書，咬音唔準之餘，悶到嚇死人，佢問過老師解釋乜係地心吸力，佢答「why why why, why the sky is so high」，真係答非所問。佢認為，如果老師用唔流暢嘅第二語言教書，學生最多都係記住，冇機會開竅。
對於田二少炮聲隆隆，咁啱吳得掂尋日都有發表「局中人語」網誌回應質疑。佢話局方檢視後，認為學校推行教學語言安排開始扎根，學生受惠於教學經驗及校本支援措施，教師亦須喺穩定嘅教學語言環境下教學，認為若果貿貿然只因學生能力而改變教學語言，係唔能夠照顧學校同埋教師需要，亦會影響成效。
卓妮