中環出更：旅遊明燈：風季不宜「郵」日
睇書除咗可以增長知識同消磨時間外，仲可以幫大家構思理想人生。卓妮尋日喺書展見到旅遊達人項明生（James），講到近日有郵輪因颱風更改航線，由原本目的地為日本改航往泰國等地，佢就話消費者難得有假期梗係唔想浪費掃興，所以事前一定要做足功課搜集資料。
James指，現時係鄰近地區打風季節，就算出發當日冇事，一個郵輪航程七至八日，梗有一日撞中打風，所以現時的確唔適合坐郵輪去日本，市民亦無謂用寶貴嘅假期去冒咁大風險，加上船公司有權因應天氣或安全問題更改航道，唔想假期被打亂，就要揀啱嘅時間、坐啱嘅船去啱嘅地方。為咗提早退休享受人生，James足足計劃咗近十年，累積儲蓄約八位數字，加有一物業在手，才放心退休四圍玩。
退而不休 紀治興搞社企
不過唔係個個退休都想四周圍去，四十九歲就退休嘅「退休達人」、惠普環球前副總裁紀治興話，退休前一定要諗好想做啲乜，有完整規劃，好多人單純話想環遊世界，其實可能百幾日就去完，之後唔知做乜好，佢個人興趣唔係周遊列國，而係投身搞社企，享受箇中樂趣。佢仲畀貼士年輕人，話好多人覺得退休好抽象，其實儲夠四百萬，每年投資回報有百分之五，即廿萬，每月約一萬七千元已夠一家三口生活開支，有條件可以退休。
金民豪最欣賞巴斯光年
一眾名人出席書展活動自然要講睇書心得，迪士尼樂園度假區行政總裁金民豪首次公開講故仔，話最欣賞卡通人物巴斯光年係一個勇敢的領袖，而著名設計師靳埭強則鍾意睇新派武俠小說，笑言有時一追就追足三日。
卓妮