架構膨脹嘥公帑 廢嶽洗腳唔抹腳

提起平機會,好多人都會諗起「政治花瓶」。冇錯嘞,呢個政治花瓶得個擺字,成立十九年來冇做過幾多件正經事,但醜聞就長爆長有,鑊鑊新鮮鑊鑊甘。

話說自從「廢嶽」周一嶽擔任主席之後,平機會洗腳唔抹腳,組織架構膨脹不特止,連辦事處都豪華過人,搞到一闊三大,租金不斷上升,竟然向政府伸手要求增加資助。呢,平機會向立法會提交嘅文件顯示,現有辦事處租金由每呎二十幾元增至逾四十四元,要求政府每年增加五百二十萬元額外資助;另外,平機會為應付新增人手及工作,需額外租用一千八百幾呎新辦事處,呎租達到四十九元,每年又需一百二十六萬元額外資助。即係話,淨係辦事處租金上升,政府每年就要向平機會增加合共六百四十六萬元資助。最好笑嘅係,平機會仲打蛇隨棍上,重提要求購置永久辦事處,並要求立法會議員支持喎,你話係咪大想頭吖?

正如關注團體質疑,公營機構根本唔需要喺市區旺地開設辦事處,尤其好似平機會咁嘅清閒衙門,使咁多錢租用位於太古城嘅辦事處,完全唔合理。再講喇,平機會本身仍擁有逾二千萬元儲備,二○一四至一五年度更錄得二百二十二萬元盈餘,咁都仲要向政府伸手,豈有此理!

更離譜嘅係,周一鑊喺未充分諮詢之下,除咗自行建議加設一個月薪十六萬元嘅營運總裁職位,並將多個總監職位「升格」加薪,導致平機會經常性開支大增。面對各界嘅質疑,平機會聲稱會密切監察新架構嘅效益,兩年後再聘用外間專家和顧問進行檢討喎。換句話講,到時又要使多一筆顧問費,問你服未。

事實證明,平機會唔止係政治花瓶,而且係獨立王國,周一鑊自把自為,直情好似無王管咁,搞到烏煙瘴氣。佢上任平機會主席冇幾耐,就提議修例引入「事實婚姻」概念,引起極大爭議;而平機會解僱曾鼓勵教友反對性傾向歧視立法嘅束健銘,更被指涉及信仰歧視和打壓異己,事件鬧上法庭,依家仲未平息。

都係古人講得啱,天下本無事,庸人自擾之。周一鑊做問責局長時渾渾噩噩,孭鑊多過食飯,而翻閹做平機會主席後一樣無事生非,添煩添亂。冇法子喇,當局千揀萬揀,偏偏揀咗呢個爛燈盞,點可能唔出事吖。今時今日港府動輒得咎,民望低落,本來已經自顧不暇,仲要負擔周一鑊呢個政治負資產,想唔死都幾難。嗱,呢啲咪叫自取其辱,唔衰攞嚟衰囉!