電影界特別多靈異事件，通常都係發生喺深夜時分，若然係拍靈異題材嘅作品「命中率」更高。最近，日本嘅青春派女歌手奧仲麻琴就因為拍戲而撞正污糟嘢，更加疑似畀污糟嘢抽水，幸好阿妹夠晒陽光氣息，最後平安無事。
近年香港出現好多政治爭拗，雙方都各有立場，事實上大家都知道，政治同經濟其實係兩個範疇，正如我哋可以要求寫真女郎有樣又有身材一樣，兩個條件完全可以並存而無衝突。有冇咁理想？梗係有啦！奧仲麻琴就係好例子啦！今年21歲嘅麻琴係日本藝能界新一代純真派女演員，亦係一名女歌手。阿妹生得氣質清純秀雅，鄰家女孩咁款，令人想起初初出道嘅安達祐實，但係論面部輪廓嘅美觀程度，我就認為麻琴更勝一籌。除咗樣子，麻琴嘅身材一樣係不可多得，胴體鮮嫩白淨，小巧得嚟又婀娜，難得嘅係如此惹火嘅身材，配上可愛嘅面孔卻完全冇唔襯，再次證明天使面孔同魔鬼身材絕對可以並存。
出生於埼玉縣嘅麻琴讀緊中三嘅時候，因其可愛面孔被藝能事務所發掘為美少女偶像歌手，經一輪培訓，唔好睇錯係陪瞓呀！阿妹就被安排成為偶像團體PASSPO☆嘅成員。由於太過標致，令佢瞬即成為團體當中最受歡迎嘅成員，可以話係標誌性人物。麻琴身材咁好，梗係唔好浪費啦，登台獻唱嘅同時仲推出個人寫真集，開拓第二條財路。2012年，麻琴仲獲電視台賞識，搵佢演出特撮片集《幪面騎士Wizard》嘅神秘少女曆一角，隨後仲拍咗唔少超人系列嘅電影版，順利進身演員之列。今年年頭，麻琴決定向影視界進軍，故宣告從PASSPO☆中畢業。早前忙於拍攝靈異電影《心靈攝影小組》，期間出現咗一件怪事。為配合題材，電影要夜間拍攝，某一晚因為種種原因拍得相當慢，時間到達深夜，超時工作嘅麻琴突然覺得膊頭被人搭咗一下，梗係擰轉頭睇吓邊個意圖抽水啦，點知發覺身後空無一人！幸好，事件並無嚇親阿妹。
奧仲麻琴好識得保養肌膚，不時會喺博客透露護膚心得，有心研究箇中技巧，不妨上去睇睇。
網址：http://ameblo.jp/11181029/
年齡：21歲
身高：5呎1吋
三圍：30-23-31
撰文：賢