政情：公民講場：四點鐘見炳良茂波

去年佔領行動期間，四點鐘「許Sir」許鎮德幾乎日日準時見大家，仲經常笑容爆燈，佢嗰句「Recap in English」更深入民心，成為警隊紅人，連藝人都要跟風玩角色扮演。雖然許Sir告別大家逾半年，但近日公屋鉛水風波，運輸及房屋局局長張炳良同發展局局長陳茂波就取代咗許sir嘅位置，日日四點鐘記者會同大家見面。不過，可能鉛水風波太大，兩位局長都愁眉深鎖，唧都唔笑。至於同樣有列席記者會房屋署署長應耀康，前晚就發道歉聲明，自覺喺前日記者會上答得唔好，反省之後，覺得應該表示歉意喎；而尋日記者會佢再就呢幾日提供預製組件嘅資料不一致，引起誤會，再講對唔住。