立法會通過將今年九月三日列為假期，紀念抗日戰爭勝利七十年，但公民黨立法會議員梁家傑（袋巾傑）就講到通過呢日假期係「向大陸獻媚」，激到前港區人大代表吳康民都要喺報章撰文，狂鬧佢「喪心病狂」三次咁多，仲加多句「漢奸走狗」添！康民叔又話，如果袋巾傑家人或先人有人曾犧牲喺日寇屠刀之下，係咪對得起列祖列宗？
康民叔話，抗日戰爭令三百幾萬中國官兵戰死、幾千萬平民喪生，換來七十年太平日子，唔通唔值得紀念咩？大鬧袋巾傑點對得住千千萬萬為抗日捐軀嘅中國軍民前輩，又指責佢早年已經講過，香港由英國殖民地，變成「中國殖民地」，將國家同地方關係，講成係帝國主義同殖民地關係，實在令人髮指，只有喪心病狂嘅漢奸走狗，先會加以抹黑。
袋巾傑回應話，得到吳老咁嘅級數，用咁嚴厲嘅言詞批評，真係非常榮幸同欣慰，覺得吳老好畀面！不過，佢重申自己一開始已講過其祖父喺日軍佔領香港期間受重傷，抗日戰爭對佢有切膚之痛。