政情：立會放榜葉國謙食雙蛋
今個年度立法會大會已經完結，我哋陸續開始幫手盤點吓一班議員嘅工作效率，當中包括議員提出口頭及書面質詢數字。雖然俗稱立法會「四大懶蟲」只係剩番經民聯議員劉皇發（發叔），但係足足有十名議員發問次數仲少過佢，當中建制派有七人，其中建制派政改方案「甩轆」事件嘅關鍵人物民建聯葉國謙更加係食「雙蛋」，睇怕佢哋唔可以再賴「等埋發叔」喇啩？
數字顯示，發叔零次口頭質詢及四條書面質詢，而葉國謙情況最嚴重，完全冇提出口頭或書面質詢。勞聯潘兆平只得一條書面質詢；自由黨方剛口頭及書面質詢各一條，工聯會陳婉嫻得兩條書面質詢；經民聯梁美芬及工黨張國柱都係得三條書面質詢。經民聯盧偉國有三條口頭質詢，公民黨梁家傑和民建聯陳鑑林就有一條口頭及兩條書面質詢，湯家驊就有兩條口頭及一條書面質詢。
據知，其實喺佔領行動期間，好少泛民議員提出質詢，所以機會畀晒建制派，之但係建制派提出質詢總數仲少過泛民，究竟搞咩呢？特別係葉國謙作為建制派「班長」，已經無提口頭或書面質詢，但政改一役搞到甩晒轆，引起建制派內部不滿，甚至嗌換人係可以理解嘅。佢解釋，有提過質詢有關佔領後嘅處理，但咁啱同黨友撞咗題目，所以撤回喎。嘩，邊個黨友咁大逆不道，連唯一一條質詢都唔讓畀佢問呢？
發叔唔使包尾 十個跟尾
潘兆平話無特別原因，自稱喺預算案都問咗好多問題，會用其他渠道跟進喎。方剛就解釋，問得少反而可以跟進業界關注議題，亦會跟進其他議員嘅質詢，呢啲係佢嘅策略喎。陳婉嫻就話黨內有分工，有時開會又撞咗區議會，而佢喺事務委員會都係問咗好多嘢，「總計係ok」。
梁美芬強調，因為「塞車」排唔到口頭及書面質詢，部分地區事項會喺區議會跟進。盧偉國就話口頭質詢可以直接同官員對話，作用會大啲。陳鑑林同梁家傑都話多咗議員，搞到排唔到隊提問。
終於唔使包尾嘅發叔，尋日就罕有現身財務委員會會議，唔知佢係咪知道統計，心情寧舍風騷，佢話出席率「唔係包尾算好」，話自己過去三十幾年都喺呢度開會，係佢責任，唔好用「特登」開會呢兩個字嚟醜化佢喎。