中環出更：書展「齊」湊熱鬧 插煲呔刊物有市
書展尋日開鑼，特首梁振英女兒梁齊昕都有去湊熱鬧，專程支持一本教做運動嘅寫真集，仲摸咗一摸寫真集一位男主角嘅腹肌，大讚對方有啲料到添！不過，佢之後就唔肯摸其他主角喇，話唔想非禮人喎！
齊昕被狗拖住做運動
佢強調，自己唔會出寫真集，又提到唔鍾意做運動，淨係鍾意去party跳舞keep fit，仲試過喺禮賓府搞咗場有百二人參加嘅大派對！雖然齊昕唔鍾意做運動，但佢話屋企隻雪橇狗就做咗佢嘅私人運動教練，被狗拖住嗰陣成日都喪跑，暗示間接做咗運動。至於之前齊昕喺Instagram上載張連鎖快餐店嘅僱員申請表，問佢係咪想去快餐店做，佢話人好認真，又話唔知自己想做咩工。
市民不斷重溫貪曾臭史
另外，三年前「貪曾」前特首曾蔭權爵士貪腐醜聞未爆出時，次文化堂已經出咗本《狂插煲呔》，以漫畫形式大數貪曾劣行，估唔到今年書展又再捲土重來出售。次文化堂社長彭志銘話，呢本書出版以來賣咗幾千本，到尋日書展都仲賣到幾十本，仍然有市。未知係咪因為貪曾案未有結果，都難平息民怨，搞到大家都想不斷重溫佢啲衰嘢。
卓妮