中環出更：暑假外遊國 有諗頭
馬季日前煞科，唞暑期間班城中名人就少咗個地方消遣，所以好多人都趁機會外遊。好似立法會工程界議員盧偉國就透露，嚟緊會同太太去北海道自駕遊，去啲比較偏遠嘅角落睇隱秘風景。佢又講笑話，曾經試過喺法國自駕遊「甩轆」，比起喺香港「甩轆」難搞好多喎！
盧偉國話，大約四、五年前同太太喺法國自駕遊期間架車爆胎，而喺當地想打電話搵人幫手換胎都唔容易，唔似得香港咁方便，一打電話就搵到，有時甚至有啲拖車會喺公路上巡。相反喺法國一來未必撞得啱啲公司嘅營業時間，地點又未必近，好在佢係工程師，加上有後備車胎，所以自己落手落腳唔使十分鐘就換好胎喇。
王英偉夫婦 俄國二人世界
香港藝術發展局主席王英偉（Wilfred）同太太亦有到場，Wilfred話今個夏天會飛起兩個仔，過番個二人世界，去俄羅斯浪漫一吓，皆因佢太太話未去過莫斯科等地，想去睇吓當地啲特色建築咁話。同場仲有莎莎國際主席郭少明女婿陳振邦及卓能集團非執行董事趙式浩，陳振邦話會同太太及兒子近近哋去東南亞旅行，到時見到邊個地方吸引就隨時出發。
趙式浩陳振邦都話去東南亞
至於趙式浩就話考慮八月放假唞一唞，佢話囝囝已經識游水，所以去東南亞享受陽光與海灘應該係個唔錯嘅選擇。不過，近日峇里火山又爆發，而南韓疫情又唔放心帶小朋友去，所以會選擇呢兩個地方以外嘅旅遊地點。
卓妮