若要人不知，除非己莫為。東方報業集團踢爆機電工程署人員喺政府物業私建「蛇竇」吞泡，醜聞曝光，全城嘩然，署方話會按章採取紀律行動喎。嗱，講得出就要做得到，咪令市民失望呀！
東網早排獨家爆料，駐守長沙灣政府合署嘅機電工程署人員早前將大樓風櫃房變身「蛇王」天地，健身器材、魚缸、雪櫃、梳化等一應俱全唔在講，有人返工時間瞓覺煲煙，有人甚至揦起氣槍玩「野戰」，簡直匪夷所思。
正所謂，有圖有真相，家陣鐵證如山，機電署想賴都冇得賴。佢哋話喎，已完成初步調查，表面證據顯示有員工曾有違紀行為，會按指引對涉事人員採取紀律行動，又話已經向所有員工重申工作紀律喎。
冇錯嘞。有錯就認，打就企定，返工時不務正業蛇王釣魚，除非你係尊貴嘅立法會議員，否則一早畀人炒咗九世，機電署話要揸正嚟做，絕對合情合理。之不過咁喎，港產官僚一向奉行大事化小，小事化無嘅管治哲學，最叻官官相衞，有辦你睇，屋邨食水含鉛超標搞到人心惶惶，當局第一時間唔係查找不足，而係玩推莊，想話將個波交畀一個持牌水喉匠，點知今次機電署蛇竇事件會唔會又係高高舉起，輕輕放下，求其搵個前線祭旗交差。
講開又講，懶蛇處處有，港府特別多，出工不出力白人工嘅又點止機電署吖。香港郵政員工被揭發集體蛇王不特止，仲虛報工時呃補水添，就因為咁納稅人每年唔見二億元；至於食環署，更加可以話係懶蛇俱樂部，有外判垃圾站長期好似無掩雞籠咁，工人遲到早退、玩手機、代簽更簿樣樣齊，五花八門，無奇不有。嗱，做細嘅固然懶得就懶，做大嘅亦唔好得幾多。最經典係行將退休嘅民航處處長羅崇文，先天下之樂而樂，喺總部打造豪華私人羅馬浴場，上樑不正下樑歪，有乜法子唔亂象叢生吖。
政府部門同公營機構烏煙瘴氣，想點懶就點懶，想點玩就點玩，唔通納稅人真係冇佢哋符？呢層大家可以放心，新聞監督作為第四權，本報一直無懼官僚權貴，堅持為民發聲，上述幾單醜聞，咪就係本報率先揭發嘅囉。
美國開國元勳、前總統傑弗遜有句名言︰「寧可有報紙而無政府，都唔要有政府而無報紙。」咁又係呀，今時今日行政、立法、司法三權各有各廢，話就話互相制衡，實際上係互相扯皮，呢個時候更加需要正義傳媒緊守崗位，揭醜揭弊。始終都係嗰句︰有東方，冇黑幕。我哋今後一定會加倍努力，唔會辜負讀者所託嘅！