九龍灣啟晴邨食水被驗出含鉛量超標一事，由最初政黨互相抽水，到後來愈驗愈慌，搞到屋邨居民人心惶惶，有議員仲聲稱考慮喺立法會十月復會後，引用特權法調查事件。政府尋日終於搶閘出招拆彈，發展局局長陳茂波宣布成立專責小組調查事件，由水務署副署長擔任主席，成員包括專家、學者、衞生署、房屋署同政府化驗所人員等，務求調查食水含鉛嘅成因。不過，政府設專責小組嘅同時，多個政黨包括建制派亦相繼抽驗水辦，唔知會唔會引爆更多問題呢？
