中環出更：「重炮」陳健波 暗批泛民呃飯食
雖然立法會否決咗政改方案，但係泛民同建制就政改立場南轅北轍、針鋒相對嘅事實仍然冇變。立法會尋日討論《選舉法例（雜項修訂）條例草案》，技術性修改明年立法會選舉功能界別嘅選民基礎、名稱等，法案最終獲通過，但尋日會議就淪為泛民建制借啲意鬧交之地。
官員：有議員借題發揮
近排成為建制派「重炮手」嘅保險界陳健波率先為功能界別議員辯護，聲稱功能界別議員出席率比直選議員高，批評部分人將佢哋誤導為「零票當選」，係被「有系統、有計劃」咁抹黑。仲話因冇人挑戰而當選嘅功能界別議員應該叫做「全票當選」，相反有部分議員「呃飯食」，做咗幾十年議員都係靠反對而生存，暗批一眾只識唱反調泛民議員。
工黨李卓人就批評功能界別係維護既得利益者。民主黨劉慧卿就反對法案，指政府只係作小修小補，認為政府失職，最終係想令功能界別永續存在。坐喺度聽議員鬧交嘅政制及內地事務局局長譚志源直指，明明法案係技術性修訂，但有議員發言借題發揮，趁機講其他嘢喎！
卓妮