政情：為求籌款 大舊自爆瘀事
人民力量（人力）立法會議員陳偉業（大舊）平時喺立法會鬧政府、「拉布」就見得多，講自己從政咁多年來嘅瘀事就較為罕見。人力尋晚舉行四周年聯歡晚宴，大舊為咗籌款不惜大爆多年來嘅蝦碌同尷尬事，認真搏到盡！唔經唔覺大舊從政已有卅年，參加過十八次選舉。大家對佢被趕出議事廳一啲都唔陌生，但原來第一名趕佢走嘅係前立法局主席黃宏發，當時大舊鬧民建聯議員鬧得太勁，又唔肯收番言論，結果被趕走。
被掟紙仔 提「冇拉鏈」
大舊又話，好多人都唔知佢做社工出身，以為佢係律師或工程師，搞到依家不時都有市民打去佢辦公室問法律問題。不過，最搞笑都係街坊成日覺得佢好熟口面，問佢係咪拍過劇集，佢就反問對方係咪喺三級片入面見過佢喎。至於最尷尬嘅事，莫過於當年搭地鐵去立法局，落車時有一名市民掟咗張紙仔畀佢。大舊話，以為紙上面寫咗啲勉勵說話，或者係留低電話，點知紙上竟然寫住「陳議員，你冇拉（褲）鏈」，搞到佢面都紅晒，真係唔小心喇！