近年唔少年輕人對工作假期趨之若鶩，職工盟尋日就搞咗分享會，提醒要小心跌落打工陷阱，仲叫埋各大傳媒到場採訪，點知去到突然話個分享會只係「內部討論」，搞到記者們個個摸門釘，職工盟就解釋係成員間溝通出現問題。不過同一時間，佢哋嘅秘書長李卓人就以工黨主席身份出席工黨舉辦嘅「新國安法」論壇，到底係佢分身不暇搞到管理不善兼大細超吖？抑或被自己嘅捐款醜聞搞到「陀陀擰」呢？
呢個「破解工作假期勞工陷阱分享會」原定尋日下午喺城大舉行，聯工盟上月已發晒採訪通知，話到時會有去過工作假期嘅人到場分享，仲有國際食品勞聯代表、台灣打工度假青年代表等透過視像會議分享，由於暑假來臨，自然吸引傳媒採訪。點知一班記者去到現場時，職工盟話個分享會屬內部討論性質，為尊重參加者，唔准記者入場採訪，結果白行一趟。職工盟當然為今次「甩轆」耍冧啦，仲「補飛」話日後會有同類採訪活動喎。