政情：幫發叔造衫 阿女照收錢
新界鄉議局前主席劉皇發（發叔）孻女劉玉蓮（Virginia）係時裝設計師，當然唔少得幫屋企人設計服飾。Virginia笑言，當年結婚嘅婚紗同裙褂都係自己親手設計，連身兼離島區議員嘅老公余漢坤當日嗰套踢死兔（tuxedo），都係Virginia根據英國皇室傳統剪裁設計。佢又笑言，幫屋企人造衫都要逐件計錢，事關係嫲嫲嘅家訓。
保留親手設計嫁衣
育有三名仔女嘅Virginia，為咗照顧小朋友近年已少咗接工作。講起幫屋企人造衫都要逐件計錢，Virginia解釋係嫲嫲多年來嘅堅持，因為嫲嫲認為打開門口做生意，無論點都要收番成本價，所以每次佢幫屋企人做設計都收番少少錢。Virginia都成日幫爸爸設計西裝，但佢比較鍾意設計女裝，始終款式變化多啲。至於佢結婚時着嘅婚紗、裙褂仍保存住，Virginia話想留畀囡囡結婚時着，傳到下一代咁話。