政情：劍指新東 建制內訌

哪吒早沿東鐵線宣傳

我哋聽聞，哪吒早已為年底區議會選舉部署十三人鑽石名單，唔理泛民、建制嘅區議員都照埋手無誤，連西貢區議會主席吳仕福都唔放過。由於哪吒一向唔聽命於建制嘅協調機制，而且上屆立法會選舉成績只係比末席嘅范國威少約四千票，難怪哪吒雄心壯志，無論點都要試吓自己可以攞幾多票。聽聞近日佢已經踏出將軍澳地頭，去咗旺角東港鐵站及上水派工作報告，擺明劍指東鐵線嘅新界東居民。

除咗哪吒同侯志強躍躍欲試，建制各黨派之間亦各懷鬼胎。雖然話建制派「甩轆」後隨即協調由民建聯派出第二梯隊出戰，傳聞嘅人選包括新界社團聯會理事長陳勇及北區區議員劉國勳。但唔少政黨都擔心今次「抬轎」後，明年選舉嘅選票再永無回頭，變相為民建聯雙手奉上第三席，因此工聯會雖然蜀中無大將，但佢哋至今仍然保留派人出戰嘅權利。至於其他政黨亦睇定啲先，唔敢爭住做「出頭鳥」。

可為正式選舉試水溫

呢次補選係為明年立法會選舉練兵嘅最佳機會，有建制中人分析，一場補選參選人可以最少兩次免費郵寄單張畀選民，唔少明年有意參選正式選舉嘅第二梯隊都會落場試水溫兼增加曝光當宣傳。建制派面對四方八面入場分餅仔，加上新界東本身已經係泛民票倉，建制派要贏似乎又添難度。