中環出更：貪曾七年唔賣地 阿松暗批
近年興起港獨、本土主義，前財政司司長梁錦松（阿松）尋日到中學分享時，正面抽擊本土主義係「怪胎」，仲話假如香港將中國拒諸門外，等同拋棄寶物然後出去行乞。不過，阿松亦明白年輕人面對激烈競爭而提出本土主義，作為對全球經濟嘅反動，佢狠批前朝政府任內七年唔賣地嘅土地政策，更加係挑起年輕人不滿嘅重大施政失誤添！七年唔賣地，應該非「貪曾」前特首曾蔭權爵士莫屬喇。
阿松尋日應邀到一間中學向百幾名同學及校友分享年少軼事，佢認為要解決年輕人對政府愈趨不滿，不外乎三個「上」，包括幫年輕人上樓、提供向上流動嘅機會同「上位」，即係將年輕人意見帶入政府。
憶大學往事 走晒劉迺強堂
講起年少往事，阿松坦言當年入讀港大修讀經濟後為咗參加活動，一整年嘅統計學都「走堂」，只係考試前四日搵同學讀雞精班惡補而合格，咁啱當年統計學導師就係同場嘅基本法委員會委員劉迺強。劉迺強告誡同學，雖然人的成敗取決於際遇，但唔係不停出席交際場合就得，建議同學要做好自己個「朵」，物以類聚自然會建立到自己嘅人際網絡。
卓妮