中環出更：走出燒傷陰霾 胡慧中：時間是最好良藥
台灣塵爆事件令人關注燒傷者嘅漫長康復之路，前民政事務局局長何志平太太胡慧中（Sabrina）尋日出席一場分享會時，諗起廿六年前拍爆破戲時被嚴重燒傷，仍不免眼泛淚光。佢話時間是最好嘅良藥，希望今次受傷嘅年輕人可以克服痛苦及負面情緒，早日走出陰霾。
Sabrina係應好友香港華菁會主席陳晴（Judy）邀請，出席「華菁沙龍：名人下午茶」活動，與一眾華菁會成員分享從台灣到香港嘅人生經驗及轉變。出席嘅有華菁會副秘書長李卓卓，仲有借出場地舉行分享會嘅德福珠寶執行董事莊菲娜及丈夫楊華勇等人。
調整負面心態 克服難關
Sabrina細述當年喺香港人生路不熟，又唔識廣東話，不過，最難捱嘅莫過於曾經轟動娛樂圈嘅燒傷事件。Sabrina話，當時佢有三成半皮膚燒傷，只要一注射嗎啡身體即產生排斥，連膽汁都嘔埋出來，需要靠食安眠藥先瞓到，但晚晚都發噩夢，終日以淚洗面。
當年外界以為佢會退出娛樂圈，不過Sabrina以堅強意志力克服難關復出，成為圈中佳話。Sabrina就剖白話，當時佢心態很負面，充滿怨恨，最終走出陰霾嘅秘訣係不斷與自己對話，同自己講上天留佢一條生路，實有特別意思，最終先至從陰霾中行返出嚟。
Sabrina嘅真情剖白令人動容，同佢相識逾十年嘅Judy讚佢生命力好強。莊菲娜趁機請教Sabrina點樣做個好媽媽，Sabrina話，日日都會同女兒傾偈，同埋不斷修正及調整自己，仲經常用「要努力」鼓勵囡囡。
卓妮