古人話，國家之敗，由官邪也。香港過去一向以廉政及法治自詡，被視為最珍貴嘅核心價值，可惜吖，喺前朝貪曾治下，港府醜聞多多，貪官輩出，廉政及法治嚴重受損，連廉政公署嘅金漆招牌都幾乎保唔住咁滯。
嗱，廉署向立法會提交嘅年報顯示，去年共接獲貪污舉報二千三百六十幾宗，話就話較前年下跌一成一，但被檢控者就有二百二十幾人，較前年上升百分之三，當中包括被判入獄嘅前政務司司長許仕仁等權貴。最值得關注嘅係，去年共有六十幾宗針對廉署人員嘅指控，包括行為失當、疏忽職守、濫用權力及工作程序不足等，多名廉署人員遭上級「訓示」。
淨係睇數字，有人可能認為本港貪污情況唔算好嚴重啫。冇錯，多數港人仍然堅持核心價值，維護廉政及法治，貪污舉報數字表面上唔算好高，弊在上樑不正下樑歪，有啲權貴其身不正，搞到烏煙瘴氣，影響成個香港形象。好似前朝政府咁吖，特首、政務司司長及廉政專員齊齊出事，一朝三貪，簡直係空前絕後。一粒老鼠屎攪壞一鍋粥，依家有咁多老鼠屎，唔怪得香港廉潔指數一跌再跌喇。
講起貪曾，真係一匹布咁長。本報二○一二年踢爆貪曾連串貪腐醜聞，廉署隨即立案調查，眨吓眼超過三年，依家仲係無聲無息，究竟查成點呢？刑事檢控專員楊家雄話喎，短期內會有最後決定，「未必需要用盡三個月，三個月內係樂觀嘅」，又認為貪曾作為前特首應該唔會「走佬」。
嗱，姑勿論貪曾會唔會走佬，當局拖拖拉拉，實在好難唔令人質疑官官相衞。當局聲稱呢單案件比較複雜，除咗法律問題要小心處理，亦涉及境外因素，唔係港府可以控制喎。咁講雖然有啲道理，貪曾「貪遍省港澳，歎盡海陸空」，搜證需時，呢個可以理解，但無論點都好，一單案查咗三年幾，幾乎可以列入世界紀錄，點都應該有結果嘞啩？正如有立法會議員話齋，當局千祈唔好重演「狼來了」嘅故事，除咗應該盡快向公眾交代調查結果，更應該即刻落案檢控貪曾。
冇錯嘞，安民之本，首在懲貪。家陣內地正全力反腐，老虎打完一隻又一隻，香港又點可以例外呢？老實講吖，相對於內地大老虎，貪曾只不過係小老鼠咋，如果港府咁都唔敢打，不如索性拆咗廉署招牌，唔好再學人講反貪喇。風水佬呃你十年八年，當局話貪曾案三個月內會有最後決定，大家不妨拭目以待，睇吓係咪又係得個講字。