政情：「偲」自組黨擬出戰新界東
立法會新界東預料有議席出缺需要補選，提早掀起泛民及建制兩大陣營嘅戰幔。正義聯盟召集人李偲嫣尋日搶閘宣布八月籌組「正義聯盟黨」，佢將由召集人過渡成為黨主席，唔使內部選舉。除咗劍指年底區議會選舉外，李偲嫣更表明「努力考慮」出戰新界東補選添。
「甩轆」在前 拒認親建制
李偲嫣一向被視為親建制，但佢否認，形容正義聯盟黨係建制光譜上嘅行動派、背景「深藍」，支持警方執法，對教育議題尤其關注。李偲嫣又強調唔會盲撐政府，過去同傳統建制派都無好深入接觸，資源及歷史都唔夠佢哋鬥，甚至可能係香港最窮嘅黨喎。
為咗同建制派劃清界線，李偲嫣更以「痛心疾首，無話可說」形容建制派上星期政改表決嘅「甩轆」事件，所以佢哋要做愛國愛港第三力量。佢哋年底會派兩人參選區議會，另派一人出戰明年立法會選舉。曾經出糧請李偲嫣做顧問嘅立法會議員梁美芬，就做埋佢哋法律顧問。