政改方案上周喺立法會表決，卅三名建制派議員因為要「等埋發叔」，喺投票一刻突然拉隊離場，搞到政改方案只有八票支持「甩轆」收場。油尖旺區議會今日召開會議，根據區議會網頁顯示，其中一項議程竟然係「支持通過政改方案」。莫非該區區議會主席鍾港武諗住總動員，就算政改無法喺立法會通過，都要喺區議會上高票通過，用遲來嘅撐政改幫建制派挽回劣勢？
「支持通過政改方案」嘅提呈人係油尖旺區議員莊永燦及民建聯區議員楊子熙，兩人同屬建制派議員。點解已被否決嘅政改方案會出現喺議程上？莊永燦解釋話，議案早喺六月十日已經提出，佢哋當時覺得立法會可能延遲表決或未有結論，所以希望喺區議會會議中討論，睇吓可唔可以爭取更多支持。事隔一周，政改方案已成明日黃花。莊永燦又話，根據議事規則，要等到今日討論到有關議案時至可以動議撤回喎！