政情：雙梁扮失憶唔認搞鬥爭
泛民去年「突襲」成功，全數加入工務小組及人事編制小組委員會，並成功取得兩個委員會嘅主導權。工務小組委員會主席梁家傑（袋巾傑）、人事編制小組委員會梁繼昌（Kenneth）尋日匯報過去一年嘅工作，前者喺會上自吹自擂話，由泛民控制嘅工務小組成功迫使政府撤回未成熟嘅工程項目，從而突顯特首梁振英「輕民生、重鬥爭」。咦？咁泛民搞「拉布」算唔算係搞鬥爭？袋巾傑就死撐，泛民只係策略性運用《議事規則》喎！
Kenneth都話，泛民搞「不合作運動」只係得個名，九個月以來根本無拉布。當日泛民信誓旦旦話要喺議會內搞不合作運動，今日就將拉布忘記得一乾二淨，唔通係丁蟹上身？
玩弄《議事規則》 阻礙民生
泛民去年單方面破壞協調協議，以「冧友」方式奪去兩個負責審議政府撥款嘅財會小組控制權，一批建制派議員其後「補鑊」逾期加入，但就遇上泛民諸多阻撓。被轟背信棄義嘅泛民毫無悔意，好似袋巾傑就話，一四至一五年度共批出四十七項工程，涉及款項亦達到四百七十七億元，反觀去年由建制把持嘅工務小組，只係批出廿一項工程。
佢又話，工務小組喺泛民控制下，可以有效監察行政機關，有策略咁運用《議事規則》逼使政府處理民生項目先，反映特首「輕民生、重鬥爭」，仲話建制派可以向佢哋借鏡喎！
聽佢講到誇啦啦，但係被反問泛民拉布阻礙民生，算唔算喺議會內搞鬥爭？袋巾傑辯駁話，阻礙不義嘅政府編排項目次序係議員應有之義。Kenneth就話，所謂不合作運動只係得個名，畀時間議員發問並唔係拉布，佢哋只係盡責任監察政府喎。
建制不容再失 泛民難突襲
咁泛民會唔會計劃喺下年度再次突襲兩個小組委員會，袋巾傑話相信建制派會力保兩個主席位。查實建制派上次痛失兩個小組委員會控制權，再加上近期政改投票上演世紀「甩轆」笑話，嚟緊實會傾盡全力、不容有失，相信泛民想爭都冇咁易喇！