中環出更：鐘錶業巨頭盼息爭拗拚經濟
長達廿個月嘅政改爭議終於落幕，雖然衍生唔少政治餘波，不過商界普遍認為香港營商氣氛最差嘅時機已經過去。由香港鐘表業總會（總會）前主席梁青華（華哥）投資嘅天寶鐘表，早前喺尖沙咀彌敦道開設全港首間零售店，開幕時有好多業界翹楚及城中名流到賀。華哥話睇好香港鐘錶業前景，希望社會放低無謂爭拗，全力拚經濟，佢同時睇好澳門市場，九月初將赴澳開設首間名錶專門店。
同場嘅總會永遠名譽會長孫秉樞亦話，希望立法會嚟緊審議嘅民生議題可以通過晒，咁就皆大歡喜喇！佢自言入行六十年見慣晒風浪，因此未驚過，事關香港本身係福地，只要大家穩打穩紮，處變勿驚就得。
租金蠶食盈利 劉楚照感觸
咁啱最近有上市鐘錶公司公布業績，盈利大跌近八成，唔通情況仲係好差？代理瑞士名錶嘅德譽（控股）董事總經理劉楚照好大感觸話，其實好多業界原本盈利唔差，但係一大截利潤都被租金食晒，如果租金可以跌一半就好。
當日嘅嘉賓逼到現場水洩不通，包括太子珠寶主席鄧鉅明、喜運佳鐘錶主席蔡加讚及總會主席張繼東等人，專程由德國來港嘅名錶品牌老闆Markus Lehmann都話對咁墟冚嘅場面大開眼界。專為低收入家庭嘅言語障礙病童提供支援嘅庭恩兒童中心創辦人黃家寧都有到，事關華哥趁新店開張，呼籲各界好友將花籃代金捐畀庭恩兒童中心。有大支票收，難怪黃家寧頂住大熱天都要親自接收喇！
卓妮