喺資訊科技時代，時間就係金錢，效率就係生命，網速就係競爭力。香港科技產業落後，連簡稱WiFi嘅公共無線網絡都相形見絀，講起簡直係羞家。正如「東方報業民意調查」顯示，受訪市民普遍認為本港科技發展緩慢，港產官僚墨守成規，實在難辭其咎。
話說港府○八年斥資二億八千六百萬元，喺全港五百幾個地方提供免費WiFi服務，包括旅遊景點、公共圖書館及大型公園等，出發點無疑係幾好嘅，可惜眼高手低，搞到唔湯唔水，有WiFi等於冇WiFi。嗱，本報記者隨機抽查全港六個公眾地方嘅WiFi網絡，再比較內地惠州等地嘅檢測結果，發現內地WiFi網速平均比香港快百分之六至一點二倍。早排廣東省宣布擴充WiFi服務，最快今年內覆蓋廣州、深圳，三年內擴至全省公共場所。反觀香港本來已經起步遲，家陣連網速都慢過人，覆蓋面亦低過人，你話係咪失禮吖。
聽吓市民又點睇吖嗱。「東方報業民意調查」顯示，對於港府提供嘅公共WiFi部分慢到幾乎冇網速，四成一受訪者認為成效差強人意；三成人批評得物無所用；一成四直指浪費公帑添。至於本港公眾地方WiFi網速比內地城市仲慢，四成三受訪者批評港府不思進取，先進變落後；三成覺得本港網絡發展龜速；一成六認為影衰香港。
冇錯嘞，本港網絡發展緩慢，好多港人都有同感，家陣內地城市大部分食肆都提供免費WiFi服務，呢方面香港更加冇得比。審計署兩年前已經批評港府WiFi服務未如理想，不符標準，點知到依家仍然冇改善，唔怪得好多受訪者批評港府充耳不聞，冇與時並進喇。
最醜怪嘅係，有外國網站測試全球一百三十個機場，喺十大提供最快WiFi機場中香港居然榜上無名，香港想唔認落後都唔得咯。
正所謂，一葉落知天下秋，香港WiFi發展滯後，正正係科技發展停步不前嘅縮影。早排香港大學派隊參加美國機械人挑戰賽，結果耗資一千五百萬港元嘅機械人行咗四步就跪低，揚威不成反變失威，多達四成半人認為科技發展進度緩慢，三成指反映本港科技發展投放資源不足，兩成認為應盡快成立創新及科技局。
所以話，各有前因莫羨人，香港愈來愈政治化，政客阻頭阻勢，連成立創科局都波折重重，仲學人講咩發展科技吖。計功夫茶話齋，深圳綜合競爭力已經後來居上，再咁落去，香港遲早淪為三、四流城市嘅咋！