政情：葉振南讚「歎」監倉飯
懲教署不時都安排團體參觀懲教所或監獄，向社會帶出更生人士嘅正面訊息。汕頭商會會長葉振南（Stephen）日前就帶隊參觀葵涌勵敬懲教所，與一眾副會長及常董初嘗「監倉飯」滋味。監倉飯餸菜有薯仔、南瓜、魚柳及眉豆粥等，清淡不難吃，Stephen試食後話味道唔錯添！不過，更生人士出獄後要覓得「一口飯」就唔係咁容易。
勵敬懲教所主要係囚禁犯輕微罪行嘅年輕女囚犯，為協助在囚人士出獄後盡快重投社會，署方安排唔少技能培訓。Stephen到訪當日，在囚人士主動用流利普通話介紹美容課程，又變身侍應，用英文示範如何喺餐廳接待客人。
籲助更生人士再就業
Stephen話，部分在囚人士入獄前學歷唔高，但入獄後發憤改過，努力學習一技傍身，所以佢呼籲商界人士伸出援手，畀機會更生人士。副會長吳漢忠聽見即時響應，佢話旗下兩間餐廳，嚟緊會考慮聘用更生人士。