民政事務局局長曾德成見網誌多過見人，佢尋日又喺局長隨筆中，以題為「改旗易幟十八年」講回歸。佢話截至去年底，香港有逾一百萬人係十八歲以下，佢哋喺五星紅旗同紫荊區旗下成長，從未經歷過「米字旗」同「龍獅旗」下嘅生活，冇可能親身經歷前後對比，但應認識歷史。
德成局長喺網誌提到香港仲有唔夠十日就回歸十八周年，政府同好多民間團體都有舉辦活動，又雀躍講番九七年六月三十日下午及午夜，英國旗先後兩次徐徐降下，香港終一雪逾半世紀恥辱。之後佢愈講愈興奮，講到十九世紀中國同列強簽定嘅不平等條約，呢股愛國激情十足黃飛鴻上身，幾乎要唱番首《男兒當自強》。最後佢就叫九七年後出世嘅年輕人應該認識歷史。
不過，去年香港經歷過七十九日佔領行動，本土主義抬頭，更有青少年走上「勇武抗爭」嘅道路。社會嚴重撕裂，但德成局長竟然依家話要呢班年輕人認識歷史，不禁要問佢上任以來，到底做過啲乜？局方除咗搞吓基本法活動，搞吓制服團體之外，到底有冇花過心思作有說服力嘅宣傳呢？須知道，國民教育、身份認同等，都應該從小開始培養，除咗民政事務局外，教育局亦責無旁貸。