政情：林健鋒「離場」 余鵬春上位
上星期政改方案表決前夕，建制派議員突然拉大隊離場，結果出現歷史性大「甩轆」，正所謂「養兵千日」，竟然用唔到一時，好難唔被清算。據悉其中一個關鍵人物林健鋒（Jeffrey）所代表嘅香港總商會，內部都對Jeffrey好不滿，仲有聲音話下屆立法會必須換人。到底邊個有力接Jeffrey個位呢？我哋從各方打聽後，得悉裕華國貨董事總經理余鵬春接棒機會呼聲最高，意味進一步淡化總商會嘅外資色彩。
談及立法會總商會代表呢個議席，少不免要講少少歷史。本身呢個位係自由黨田北俊（田少）把持，○四年田少將位置讓予當時同黨嘅Jeffrey，Jeffrey去到○八年先同自由黨決裂，但仍然做足三屆議員，三年前仲做埋行政會議成員。不過，世事嘅嘢好難講，經過上周「等埋發叔」事件後，Jeffrey喺總商會內嘅地位已受到動搖。
中外資本勢力較勁
有總商會中人話，Jeffrey已經做咗三屆議員，加埋今次政改衰咗，係時候退位讓賢。據了解，Jeffrey目前最少受兩面夾擊，首先係來自紅色勢力嘅衝擊。余鵬春向來有意進軍立法會，本來佢密謀藉自由黨批發及零售界議員方剛明年退休，想搶佔批發及零售界議席，但據悉當Jeffrey成為政改甩轆關鍵人物後，唔少人都游說佢轉戰代表總商會嘅商界功能界別。
余鵬春做慣零售界，但喺總商會都好有江湖地位。現時佢係總商會理事，當年角逐商界選委亦高票當選。話雖如此，總商會向來有「西商會」別稱，會內充斥外資企業，好似現任主席彭耀佳，背後就係香港置地集團。余鵬春能否借Jeffrey失勢而上位，還看明年總商會換屆選舉，如果能夠換上紅色色彩較濃嘅主席，相信余鵬春叫胡機會甚大。倘若形勢真係咁發展，到時總商會同中華總商會就冇乜分別。
自由黨謀重奪議席
至於第二個衝住Jeffrey嘅力量則係自由黨。眾所周知，該黨對總商會議席有情意結，尤其係田、林二人不和後，該黨成日盤算點樣奪回議席。幾年前開始，田少已經安排黨內第二梯隊陳浩濂（Joseph）入總商會，Joseph本身係渣打銀行投資部任職高層，合晒總商會口味。本來田少想Joseph浸淫多幾年先至浮面，但依家Jeffrey自毀長城，唔知道田少會否提早下令Joseph熱定身呢？