中環出更：財爺借NBA暗寸建制冇隊型
政改表決當日建制派議員發動拉隊離場嘅「甩轆」事件，令政改方案僅獲八票贊成而大比數被否決。財政司司長曾俊華（鬍鬚曾）及立法會主席曾鈺成尋日先後抒發感受，鬍鬚曾先喺網誌話對政改被否決感到十分可惜，又借NBA球隊金州勇士暗寸建制派唔團結兼冇隊型。其後曾鈺成出席一項活動時談到當領袖嘅條件時，亦暗批建制派冇團隊溝通、冇默契，出事時又未能保持清醒頭腦及鎮定心態應對。
鬍鬚曾話，今年支持嘅金州勇士隊得到四十年來首個NBA總冠軍，而該球隊非常重視整體性，後備兵源充足；相反騎士隊縱有「大帝」勒邦占士「單天保至尊」，但雙拳難敵四手。鬍鬚曾又話，七十年代末、八十年代初嘅NBA球隊注重走位同整體合作，球迷愛分析教練使用嘅戰術，認為係體力與智力結合嘅運動。咁講法，擺明就係暗寸建制派冇隊型。
曾鈺成亦批冇默契
至於曾鈺成就話，一個出色領袖應該具備嘅條件，其中好重要係溝通能力，要同團隊有效溝通，明顯寸爆建制派冇默契，令台下觀眾哄堂大笑，點知佢仲幽默反問：「乜我有講笑話咩？」佢之後仲直接舉例，話應變能力好重要，好似班議員計到發言時間幾準都好，表決時一樣會出事，所以一個好領袖要預計到，就算設計到最好嘅活動都會有出事嘅時候，要保持清醒頭腦及鎮定心態應對。
曾鈺成仲話，決斷能力亦好重要，出色嘅領袖要當機立斷，喺適當時候做最適當嘅決定，可以詢問他人意見，但唔可以將決定推畀其他人囉！
卓妮