香港郵政管理不善，年年虧蝕，無論對市民或者港府嚟講，都係一個大包袱。之不過咁，對於騙徒嚟講，香港郵政唔止唔係大包袱，仲係提款機，予取予求添。
呢，前郵政員工爆料，有人睇準郵政寄失郵件嘅賠償漏洞，懷疑自編自導自演寄失郵件，將報稱價值數百元嘅貨品寄往海外山旮旯地方，然後報稱寄失，向郵政索償。好似其中四間公司咁，不斷車輪轉報稱「寄失」郵件，其實四間公司都由同一名張姓女子持有，話無蠱惑都無人信喇。最匪夷所思嘅係，當郵政前線員工發現唔對路向上司反映事件，上司居然闊佬懶理，搞到香港郵政淪為騙徒提款機，五年來涉及本地及外地寄失郵件嘅賠償高達一千六百萬元，問你服未。
開講有話，第一次受騙，係騙子嘅錯；第二次受騙，係自己嘅錯；第三次受騙，就係自己愚蠢。香港郵政不斷重複受騙，畀索償黨予取予求，何只係愚蠢，簡直就係嚴重失職。正如立法會議員話齋，部分索償個案擺明有問題，郵政瞌埋眼照賠，根本就係敷衍塞責，唔怪得騙徒有恃無恐，更加唔怪得郵政年年虧蝕喇。
正所謂，沒有最醜，只有更醜。香港郵政縱容索償黨呃錢，聽落好似好荒謬，但係諗深一層，其實一啲都唔令人意外。大家都知喇，郵政官僚一向尸位素餐，秉承少做少錯、唔做唔錯嘅懶蛇作風，可能係為咗慳水慳力啩，明知索償個案有蠱惑都照賠，反正損失嘅又唔係自己嘅錢，有乜所謂啫。話時話，官場貪污歪風日盛，而香港郵政又烏煙瘴氣，可能有人裏應外合搵公帑着數o架。計功夫茶話齋，索償黨騙案疑點重重，審計署固然要主動介入調查，廉政公署亦不妨深入跟進，話唔定會有意外收穫o架。
講起唔知好嬲定好笑，香港郵政管理混亂，一方面對騙徒索償有求必應，一方面「失信於民」鬧劇不斷，淨係舊年就遺失五千多個郵件，你話係咪荒謬吖？仲有吖，郵政年年蝕大錢，佢哋唔係諗辦法改善服務，提高效益，反而一味諗縮數，唔係縮短郵局營業時間，就係索性關門大吉，佢哋究竟係咪真心服務市民，畫公仔唔使畫出腸喇。最離譜嘅係，郵政官僚不務正業，居然充當政治打手，涉嫌違法滋擾東方報業集團，事後嘅調查又敷衍了事，連道歉都冇句，簡直豈有此理。
咁講喇，香港郵政烏煙瘴氣，敷衍塞責，話就話服務市民，其實係靠害市民，同呃神騙鬼嘅索償黨都係一擔擔嘅咋！