模影模蹤:瑪魯娜 混血魅力 美臀女神

每當聽到混血兒三個字時,總會對佢哋嘅外形有聯想,事關喺好多人心目中,混血男女不但擁有標致樣貌,仲有與別不同嘅氣質。姑勿論大家同唔同意呢個睇法,只係可以肯定擁有四分之一維吾爾族血統嘅內地索模瑪魯娜,喺模特兒界散發着令人印象難忘嘅魅力。

電視揚名

原名湯曼玲嘅瑪魯娜,英文名叫Manuela,嚟自中國四川並擁有四分之一維吾爾族血統。喺2011年以平面模特兒身份投身模特兒界嘅佢,至今已經有約四年經驗。不過喺佢初入行嘅時候,雖然憑住混血美女嘅誘人樣貌,及玲瓏浮凸嘅身材,喺模特兒界略有名氣,亦經常喺時尚雜誌、汽車品牌廣告、遊戲展等活動中亮相,但講到佢真正打響名堂,卻同模特兒身份一啲關係都冇,反而一個電視節目終於令佢喺內地揚名。話說佢喺2014年以湯曼玲嘅名字及市場部經理身份,報名參加內地著名相睇節目《非誠勿擾》,即時令佢成為節目嘅其中一個焦點。憑住呢個人氣電視節目,佢嘅名字終於為大家所熟悉。

心動股惑

自此以後,佢成功進軍電視界,並且曾經喺電影中亮相。不過喺佢成名之後,仍冇忘記模特兒工作,不但繼續以模特兒身份推出養眼寫真,超火辣嘅造型更係令佢愈嚟愈紅。如果有留意佢嘅寫真,唔難發現佢經常展露誘人嘅美股,而事實上,喺身體各個部位中,佢最滿意正正係自己嘅臀部。憑住圓渾得嚟又富有彈性嘅美股,為佢贏得「美臀女神」嘅稱號。近年嘅佢除咗喺模特兒、電視同電影三個範疇上發展外,亦同其他內地模特兒一樣,積極埋首於電玩界,不但為手機遊戲代言,近期亦參加手機遊戲女神選美比賽。其實以佢咁誘人嘅外形,同埋與別不同嘅混血美女氣質,想喺內地嘅模特兒界再闖高峰一啲都唔難,而未來嘅發展亦絕對值得大家期待!

個人微博

瑪魯娜混血美女嘅樣貌確係令人一見難忘,加上佢火辣身材及夠放嘅寫真演出,難怪成為人氣女神!不過私底下嘅佢,又係個乜嘢人嚟呢?如果想更深入認識,就要去佢個人微博,增加對佢嘅了解喇!

網址:weibo.com/maybe0929

瑪魯娜Profile

出生地:四川

身高:165cm

三圍:33、25、35

撰文:魂