香港郵政經營不善，流血不止就係人都知；最新一份年報披露，一二至一三財政年度營運虧損高達一億一千四百萬元。之所以搞成咁，真係見微知著，香港郵政涉嫌滋擾東方報業集團，煞有介事的「調查」了近半年，疑團未解何以「信中信」明明地址完整，不但沒有投遞，更以寄件兩個月後才以另類方式被退回。
好嘞！郵政一錯到底，不肯認錯，不肯認衰，不肯道歉，一味遁詞回覆「沒有紀錄」、「未能查明」、「調查困難」等字眼草草結案！香港郵政嘅低級錯誤，講真，幼稚園水準都未達到，何以咁講，皆因老朽唸小學之孫女，唔好話如廁後必洗手，即使每次食飯前必認真用洗手液洗手。一次，老朽試探之：哎喲，又不是手有泥，求其濕一濕，抹乾淨得喇！但見她眉頭深鎖，一臉正經咁回答：爺爺！咁點得o架，我從上幼稚園嘅時候，老師教落，依家已養成了習慣啊！
你看！幼稚園老師要增起薪點，要加薪，老朽係舉腳百分之一百贊成！皆因佢哋教導有方，可以影響孩子一生一世也。
言歸正傳，講番香港郵政，本報真係愛之深責之切，今次又踢爆其縱容騙徒呃錢，有離職嘅郵政員工直斥上層明知所謂「寄失件」有問題，都扮冇嘢照賠！而前線員工亦發現唔對路，而上層竟可以得過且過，敷衍塞責，係唔係都「賠住先」，政府宣傳片都有話：啲騙徒取易不取難，咁容易呃，唔向你埋手豈不是對唔住老細！
香港郵政經營不善，劣行滔滔，管理呢家嘢，除了制度、文化、意識形態外，最重要其實係合理嘅法律和盡量的公正！
錯了不肯認，理屈詞窮，一味遁詞狡辯，終歸小錯愈積愈多變成大錯特錯，最後積錯難返，落得沉淪下去，令人睇見眼冤——此香港郵政最佳寫照也。