政情：元創方具潛力 變身「東大門」
推動本地創意、協助年輕設計師創業嘅PMQ元創方，眨眼一周年，尋日叫齊方內一眾開業一年嘅老闆舉行另類生日派對。雖然無蛋糕切，亦無蠟燭吹，但設計師就分享搞創意產業心得。時裝設計師何裕釵（Chailie）認為，本地不乏拚搏、敢於追夢嘅創意人才，有條件打造成「香港東大門」，成為國際買家採購原創產品嘅集中地。
進駐元創方嘅過百位設計師，各有辛酸創業故事。「超級慳妹」Chailie十六歲開始狂做兼職賺學費，二十三歲儲夠錢入讀英國倫敦時裝名牌學府Central Saint Martins College of Art and Design，畢業後回港創業，敲門寄賣貨品卻吃盡閉門羹。年前終於在元創方開店，卻因為無錢裝修，要自己動手油牆，又買來舊水晶粒燈翻新再用。如今守得雲開，Chailie開始為藝人、明星造衫。
追夢嘅仲有年輕建築師吳鎮麟，兩年多前畢業於港大及美國麻省理工學院建築系，與兩位好友喺方內開設計師樓。原以為做老闆可享受更多私人時間，誰知開店後，忙足一年無假放，但最終有機會替名店及豪宅做室內設計，算是苦盡甘來。