政情：馬逢國做莊 賭政改通過
幾日前有京官喺深圳閉門會見泛民立法會議員時，講到中央政改立場非常堅定，好似完全無彎轉咁。不過，政治一日都嫌長，距離政改表決仲有十幾日，乜都可以發生，所以唔少政圈人士仍然樂觀，甚至有一位建制派人士深信政改好大機會通過，索性做埋莊家，私下同其他政圈中人打牙骹對賭，呢位仁兄就係立法會體育、演藝及文化出版界議員馬逢國。唔通佢收到內幕消息？
議員官員一齊玩
自從京官在深圳放話後，唔少人都覺得政改已經「凍過水」，甚至係提早宣布死亡。不過，基於上次政改都係臨表決前幾日先出現意想不到嘅結局，所以唔少人都抱住呢種心態，覺得中央今次依然會照辦煮碗，最後關頭點都會釋出善意。泛民有呢種心態的確唔奇，但估唔到連建制派中人都竟然看好，深信政改可以獲泛民支持而順利通過，馬逢國就係其中一位。
有政圈中人爆料，話馬逢國幾個月前同人傾偈，席上有人睇淡政改前路，認為泛民必定否決政改，點知馬逢國反而唱反調，仲話可以賭一餐飯喎。呢個傳聞傳開去後，好多人都有興趣同馬逢國對賭，參與人數仲愈來愈多，除咗立法會議員外，聽講連政府官員都玩埋一份，夾夾埋埋，佢一共同人賭咗十幾餐飯，如果政改否決，睇怕條數都幾襟計，除非佢同人賭飯盒嘅啫。
信心十足拒解釋
點解佢咁有信心呢？其實建制派有兩種人，一種係扮知道北京諗法，一種就真係知北京諗法。馬逢國係資深港區人大代表，曾經係人大選舉「票王」，收北風非常準確，當然屬於後者啦！即使最近日中央立場異常強硬，但馬逢國仍然未「封盤」，依然接受朋友同佢賭牙骹。尋日我哋問佢點解咁有信心，佢就笑笑口唔答，只係話對政改仲好樂觀。就係呢個答案令成件事更撲朔迷離。