中環出更：匯聚一堂 馮煒光被寸
香港家庭教育學院日前舉行以「傳承」為主題嘅五周年籌款晚宴，學院主席兼鴻福堂執董司徒永富仲請咗力撐政改「袋住先」嘅政府新聞統籌專員馮煒光、立法會前議員李華明（肥仔明）同黃成智出席。咁啱得咁蹺，馮、李、黃三人同學院總監狄志遠都係前匯點（白鴿黨前身之一）成員，有緣聚首。不過，揚言否決政改嘅教育界議員葉建源就唔多畀面，即場寸爆馮煒光嘅「三個字」政治笑話。
話說身兼學院董事嘅葉建源當晚即席揮毫籌款，一拎起支毛筆就話要寫「三個字」，點知最後寫咗「海闊天空」四個字，明寸喺台下曾爆出金句「三個字：不予置評」嘅馮煒光。馮煒光被寸時，由頭到尾「唧」都唔笑、木無表情，反觀葉建源同台下觀眾就笑得好開心，而狄志遠就捐出手抄畫作供拍賣籌款。
胡曉明食過「藤條炆豬肉」
講番籌款晚宴嘅主題「傳承」，肥仔明就好幽默話，最明顯係佢傳承咗自己個身形畀寶貝女，但好在女兒減肥功力青出於藍，近日修身成功。卓妮同場又見到城市大學校董會主席胡曉明，佢回憶童年時話，爸爸好錫佢，反而媽咪角色就相對嚴厲，間中仲會請佢歎「藤條炆豬肉」添，但佢冇嬲，反而認為小朋友喺未懂事前，適度體罰可以令佢哋知道痛同錯喺邊。
食物及衞生局常任秘書長謝凌潔貞亦有捧場，原來佢同葉建源係同屆同系嘅大學同學，又爆對方係學生會代表，葉建源就謙稱自己只係「內副」，即內務副主席喎。雖然當晚咁多政界人物出席，但竟然大家隻字不提政改，唔通真係無乜好講？
卓妮