綠色先鋒:跑裝接力

近年跑步風盛行,相信不少發燒友均會添置跑衫跑鞋等裝備練跑,加上不少舉辦跑步比賽的機構為吸引跑手參賽,亦紛紛送上跑Tee。一名跑手隨時擁逾十件跑Tee,跑鞋亦至少兩、三對,「着極都着唔爛」,部分惟有打入冷宮,造成浪費。多名「環保跑手」發起回收跑Tee及跑鞋活動,轉贈本地、台灣、尼泊爾及肯尼亞等地的有需要人士。有跑手更曾親身帶回收物資到肯尼亞,了解當地人真正需要之餘,更體驗了不一樣的跑步樂趣。

四、五年前踏上跑步徑的Clara,前年經跑友認識肯尼亞失明跑手Henry及其領跑員Joseph,開始接觸非洲肯尼亞,「肯尼亞人為咗脫貧,好多人練跑,但好窮,好多時連跑鞋都無。Henry同Joseph就想喺香港收唔要嘅鞋(回國)。」Clara與跑友於是在社交網站開設專頁回收跑步裝備,結果卻令他們十分吃驚,「開咗個page無幾耐,已經有二千個人join(參加),嗰陣好驚,如果收到二千對點算呢?最後一星期分咗三日回收,收到幾百對鞋同過千件衫。」

轉贈有需要人士

Clara指,回收量反映港人浪費問題嚴重,「我哋收番嚟嘅鞋同衫好多都好新,有啲甚至無着過。」她指近年跑風盛行,各大運動品牌的宣傳攻勢猛烈,不少人為追款,即使跑步用品「無穿無爛」都照買新品,加上參加跑步比賽時收到的跑Tee,令家中的跑步裝備往往堆積如山。

Clara續指,回收的物品主要送到肯尼亞、尼泊爾等落後國家,運費往往要數千元,為了節省運費,要靠Henry和Joseph來港比賽後親自帶回當地。前年六月,Clara更與跑友帶同大量物資遠赴肯尼亞探訪,親身體驗肯尼亞的生活。未來Clara計劃與台灣的非牟利團體合作,送贈跑鞋及跑衫到當地。

社工阿裕每年至少參加十個跑步比賽,幾年來累積數箱跑Tee,起初將衫送給家人及朋友,但亦「散唔晒」,惟有透過其他社工朋友,捐贈予無家者及有需要的家庭。深受共享環保概念影響的阿裕,更向其他跑友回收全新的跑Tee,「啲衫無用最後都係擺喺屋企同堆填區,資源可以運用得好啲,我都希望透過捐衫出去,令更多人認識跑步呢個運動。」他呼籲跑手參加比賽盡量穿舊跑Tee,捐出全新的跑Tee予有需要的人,「唔好為咗影張相就拆開件衫,盡量保留全新,送畀人會多份尊重。」

圖:崔祖佑、關萬亨

文:溫盈盈

第一手消息請下載on.cc東網iPhone/iPad/Android/Windows Phone Apps