有個笑話係咁嘅︰有個人喺森林迷路，兩日後終於遇到一個人，以為今次有救啦，點知對方竟然話，你咪算好囉，我已經迷路七日啦！
咪以為只係笑話吖。本港法例規定大廈同地舖必須展示正確門牌號數，可惜好多人有法不依，法例形同虛設，搞到通街「無牌大廈」，好似石屎森林咁，唔迷路至奇。本報多次踢爆負責執法嘅差餉物業估價署對亂象視而不見，以致問題不斷惡化，連申訴專員公署亦忍唔住介入調查，結果發現問題多多。
呢，差估署過去六年向違規業主發出超過八千五百宗警告，但「標示命令」只有廿八張，最誇張嘅一宗個案，差估署由首次巡查到最終發出「標示命令」，相距長達十九個月。不可不知，「標示命令」具有法律效力，一般違規者收到命令唔敢怠慢，都會迅速糾正，本來好有阻嚇力，可惜當局唔識得好好利用，有法例等於冇法例，有乜法子唔亂象叢生吖。
咁都未算，差估署一三年起開展「門牌號數展示運動」，巡查各區樓宇，係威係勢，原來至今只巡過兩次咁大把，仲唔包括深水埗等門牌錯亂重災區，擺明敷衍民意啫。
咪以為門牌錯亂係小事吖，市民無所適從仲係其次，最大鑊係影響消防同警方等執行職務，延誤救援，分分鐘搞出人命。申訴署提出七項建議，包括為執法步驟制訂指引，盡早發出「標示命令」，以及加強宣傳等，差估署收到未吖？
話時話，港產官僚一向奉行多做多錯、少做少錯、唔做唔錯嘅哲學，隨時又係意見接受、態度照舊嘅咋。其實，門牌亂象已存在多年，如果真係要改善，都唔使等到今日喇。差估署前幾年巡查發現，依法展示門牌嘅業主有九成半，到前年居然跌至八成四，連銀行等大企業都公然違規，咪就係因為當局執法懶懶閒，好似無牙老虎咁囉。
見微知著，差估署做嘢甩甩漏漏，求求其其，早就唔係新聞咯。之前有離島村民申請門牌，結果獲編配號數同鄰居一模一樣，問你服未。最好笑嘅係，署方編派畀市民嘅門牌號數，居然同其他部門嘅通訊門牌唔同，差估署話係三號，其他部門話係二號，都唔知究竟信邊個好。正所謂，三個和尚無水飲，呢啲只係政府部門各自為政嘅縮影咋。大家有眼見，無論管理樹木，抑或取締僭建，政府部門都係互相卸責，互扯貓尾，結果多人管等於無人管，有邊瓣唔係搞到一鑊泡吖。
所以話，港產官僚連門牌咁簡單嘅問題都搞到七國咁亂，旨意佢哋做大事喎，等於緣木求魚，盞嘥氣嘅咋！