立法會金融界議員吳亮星（星爺）一向金句多多，繼早前力撐「阿媽幫仔揀老婆」之後，尋日佢喺特首答問大會上又爆金句。星爺批評泛民主派議員「拉布」影響本港金融經濟發展：「香港市民既需要民主，但更加需要嘅係銀紙！」唔知有冇講中廣大市民嘅心聲呢？星爺批評，立法會「拉布」令政府無法提供合理資源畀一啲前期工程，反問當局係咪應該就「拉布」對經濟造成嘅影響進行評估及制訂應對方案。
