政情：Ann設計包頭裝冧少數族裔
潮流興自家設計，平日已經相當識打扮嘅立法會議員蔣麗芸（Ann）亦趕上潮流，首次幫自己設計咗套上衣連披肩，更集齊各國民族特色，非常搶鏡。阿Ann笑言，一直關注少數族裔議題，所以呢身形象正好啱晒出席佢哋嘅活動，啱晒嘴形喇。
中菲越特色匯印度布料
相當風騷嘅阿Ann向我哋解構佢一身造型，透露印度布料係早前去尼泊爾旅行嗰陣順道買落，只需港幣約二百元，返港後再將自己嘅設計概念講畀裁縫知，話要中式企領、菲律賓公主袖襯越南姑娘最鍾意嘅側面開叉設計，手工費都只係八百元有交易，認真抵玩。
講到咁別具特色，阿Ann仲即場示範民族上衣嘅三種着法，包頭又得、纏腰或掛頸保暖亦得，得咗！