近年每逢施政報告或特首答問大會，一班泛民主派議員好興玩集體離場抗議，但唔知佢哋係咪怕離場減低曝光率，喺尋日嘅特首答問大會冇重演集體離場嘅戲碼。不過，留喺議會都冇好嘢，反而笑料百出，事關民協馮檢基（阿基）及人民力量陳志全（慢必）先後出錯，阿基將人大「八三一」決定變成政改方案，慢必就講錯上廣州見京官，認真貽笑大方。
阿基日前話會喺見京官時提出「凍結」政改，已經被人質疑抄基本法委員會委員陳弘毅條橋。尋日佢喺答問大會上，竟然撈亂咗人大「八三一」同政改方案，「依家民意旗鼓相當，特首會唔會尊重民意，收回『八三一』方案」。特首梁振英隨即反駁話「八三一」方案唔係特首方案，唔係特別行政區政府嘅方案，阿基先改口話提交立法會嘅方案。
另外，決定唔跟隊上深圳見京官討論政改嘅慢必，尋日就將議員上深圳見京官講錯做上廣州，仲要一連講錯兩次。
梁振英回應時，都忍唔住岔開話題，特登指出深圳同廣州係兩個唔同嘅城市，「廣州唔係深圳一部分，深圳唔係廣州一部分，所以我哋係去深圳，唔係去廣州」。兩位議員犯咗咁明顯嘅錯，真係想兜都好難。